निर्माण पूरा भएपछि देशकै ठूलो जलाशययुक्त आयोजना हुने यो जलविद्युत आयोजनाका लागि जग्गा अधिग्रहणको काम निकै चुनौतीपूर्ण मानिएको थियो।

जग्गा वर्गिकरणको काम भइसकेकोले यसै महिनाको अन्तिमबाट मुआब्जा वितरण कार्य शुरु हुने मुआब्जा निर्धारण समितिका अधिकारीहरुले बताएका हुन्।

बुढीगण्डकी नदी किनारमा रहेका धादिङ र गोरखाका व्यक्तिको नाममा रहेको झन्डै ६७ हजार रोपनी जग्गाको मुआब्जा वितरणका लागि प्रक्रिया शुरु हुन लागेको मुआब्जा निर्धारण समितिका अधिकारीहरुले बताएका छन्।

झन्डै एक वर्ष लगाएर मुआब्जा वितरणको वर्गीकरण प्रणाली तयार पारिसकेको बताउँदै मुआब्जा निर्धारण समितिका संयोजक तथा धादिङका प्रमुख जिल्ला अधिकारी विश्व प्रकाश सुबेदीले भने, "हामीले दशैं अगाडि नै मुआब्जा दिने योजना बनाएका थियौं । त्यो सकिएन। अब हाम्रो लक्ष्य मंसिर लाग्न अगाडि नै वितरण शुरु गर्ने हो।"

आयोजना विकास समितिले मुआब्जा वितरण गर्नका लागि ११ तरिकाले जग्गा वर्गीकरण गरिसकिएको बताएको छ।

तर कस्तो वर्गीकरणको जग्गालाई कति रकम दिने भन्ने निर्णय भने हुन बाँकी नै रहेको बुढीगण्डकी जलविद्युत आयोजना विकास समितिका कार्यकारी निर्देशक गोपाल बस्नेतले बताए।

उनले भने, "वर्गीकरण गरेका खेत, बारी, सडकसंग जोडिएका जग्गा र वैकल्पिक सडक जोडिएका जग्गालाई कति रकम दिने भन्ने अहिलेसम्म निर्णय भएको छैन। तर त्यो छिट्टै नै गरिने तयारी भएको छ।"

प्रस्तावित १२ सय मेगावाट क्षमताको यो जलविद्युत आयोजना निर्माण गर्दा गोरखा र धादिङका २७ गाँउका ३५ सय बढी घरपरिवार विस्थापित हुने बताइएको छ।

उनीहरुको पुनर्वास र पुनर्स्थापनाका लागि ६१ अर्ब रुपैँया खर्च हुने अनुमान गरिएको छ।

तर हाल सरकारले मुआब्जा वितरणको लागि ५ अर्ब रुपैँया मात्र छुट्याएको छ।

बाँकी रकमका लागि सरकारको उच्च तहबाट बाचा दिइसकेकोले त्यसमा समस्या नहुने विश्वास आयोजनाका अधिकारीहरुको छ।BBC Nepali Service

गोरखा, ३० असोज ।ओम डेभलपमेन्ट बैंक लि. र मनास्लु विकास बैंक लि. मर्जरमा जानको लागि सैद्धान्तिक सहमति गरेका छन् । मर्जरपछि बैंकको चुक्ता पुंजी १ अर्ब ३३ करोड, निक्षेप १३ अर्ब ९८ करोड , कर्जा १२ अर्ब ६१ करोड पुग्नेछ भने ३६ वटा शाखा हुने छन् ।ओम डेभलपमेन्ट बैंक लि।को प्रधान कार्यालय पोखरा र मनास्लु विकास बैंक लि।को प्रधान कार्यालय गोर्खामा रहेको छ । मर्जर पछि बैंकको प्रधान कार्यालय पोखरामा रहनेछ । हालसालै ओमको सञ्चालक समितिले २९।२० प्रतिशत बोनश शेयर र मनास्लुको सञ्चालक समितिले बोनस र करसहित १८।९५ प्रतिशत लाभांश दिने निर्णय गरेको छ । नेपाल राष्ट्र बैंक र साधारण सभाले दुबै संस्थाको बोनश शेयर पारित भएपछि मर्जरपछि बैंकको चुक्ता पुंजी १ अर्ब ६८ करोड पुग्नेछ ।सैद्धान्तिक सहमति अनुसार मर्जरपछि बैंकको नाम ओम डेभलपमेन्ट बैंक लि. रहनेछ । मर्जरपछि बैंकको अध्यक्षमा ओम डेभलपमेन्ट बैंक लि. अध्यक्ष सुशिल कुमार गोशली, प्रमुख कार्यकारी अधिकृतमा ओम डेभलपमेन्ट बैंक लि. का बिश्व मोहन अधिकारी र नायव प्रमुख कार्यकारी अधिकृतमा ओम डेभलपमेन्ट बैंक लि.का बुद्धि मल्ल र सहायक महाप्रवन्धकमा मनास्लु विकास बैंक लि.का निमित्त महाप्रवन्धक दुर्गा राम पुरी रहनेछन् ।

गोरखा,१ साउन । जिल्लाका हेभि इक्यूपमेन्टका अप्रेटरहरुको प्रथम गोरखा जिल्ला भेला सम्पन्न भएको छ । 

 हेभि इक्यूपमेन्ट संघका जिल्ला अध्यक्ष डिल्लीराम खड्को अध्यक्षतामा भएको नेपाल हेभि इक्यूपमेन्ट अपरेटर संघको प्रथम जिल्ला भेलामा कार्यक्रममा हेभि इक्युपमेन्ट ब्यवसायी संघका केन्द्रिय सदस्य फणिन्द्र भट्ट, केन्द्रिय अध्यक्ष लोकमान खत्री, एल पी खत्री, पत्रकार महासंघका अध्यक्ष भीमलाल श्रेष्ठ , जेसिबी कम्पनीका लबिसराज बर्ताैला लगायतले बोल्नुभएको थियो । जेसिबीको आर्थिक सहयोगमा आयोजित भेलाका सहभागी लाई जेसिबीका प्रमोद सत्यालले प्राविधिक विषयमा सहजिकरण गर्नुभएको थियो ।

गोरखा ,२६ असार । जिल्ला विकास समिति गोरखाको आयोजनामा सार्वजनिक सुनुवाई कार्यक्रम सम्पन्न भएको छ ।

 जिल्लामा सम्पन्न विकास निर्माण योजना तथा सरकारी कार्यालयहरुको सेवा प्रवाह बारे सहभागीहरुको जिज्ञासा तथा गुनासा माथी गोरखाका प्रमुख जिल्ला अधिकारी नारायण प्रसाद भट्ट ,नारायण आचार्य सहित विषयगत कार्यालय प्रमुखहरुले जवाफ दिनुभएको थियो । पत्रकार किशोरजंग थापाले सहजीकरण गर्नुभएको उक्त सार्वजनिक सुनुवाई कार्यक्रममा सहभागीहरुले विकास निर्माण ,सेवा प्रवाह ,विद्युत ,भूकम्प पछिको पुर्ननिर्माण लगायतका विषयमा जिज्ञासा राखेका थिए ।

गोरखा ,३० जेठ ।नेशनल लाइफ इन्स्योरेन्स कम्पनी लिमिटेडले भूकम्प ज्यान गुमाउने आफ्नो बिमितहरु लाई मृत्यु दाबी वापतको रकम भुक्तानी गरेको छ ।

 भूकम्पमा ज्यान गुमाउनेहरु गोरखा गुम्दाका मिहर सिंह गुरुङ्गका परिवारलाई एकलाख ९ हजार ,बारपाकका सुममाया गुरुङ्गका परिवार लाई एकलाख ६७ हजार एकसय ,सीतामाया गुरुङ्गका परिवार लाई दुई लाख १२ हजार २ सय ,शर्मीला गुरुङ्गको परिवार लाई ३ लाख १८ हजार ३ सय र बिर बहादुर गुरुङ्ग परिवार लाई २ लाख १८ हजार ३ सय रुपियां मृत्यु दाबी भुक्तानी वापतको नेशनल लाइफ इन्स्योरेन्सले प्रदान गरेको हो । त्यस्तै अर्काे एक दुर्घटनामा ज्यान गुमाएका थुमीका हरिलाल थापा परिवार लाई पनि एकलाख रुपियां प्रदान गरेको छ । राष्ट्रिय बिमा समितिका अध्यक्ष प्रा.डा.फत्त बहादुर केसीको प्रमुख आतिथ्यता र नेशनल लाइफ इन्स्योरेन्स कम्पनी लिमिटेडका महाप्रबन्धक एवं प्रमुख कार्यकारी अधिकृत भरत बस्नेतको सभापतित्वमा भएको एक कार्यक्रम बीच सम्वन्धित व्यक्तिका परिवारजनलाई सो रकम भुक्तानी दिएको हो ।

गोरखा ,२६ जेठ । गोरखा सदरमुकाम हरमटारीमा प्रधान कार्यालय रहेको कसमस डेभलपमेन्ट बैंक लिमिटेडले भुकम्पबाट पिडितको राहतका लागि प्रधानमन्त्री दैवि प्रकोप उद्धार कोषमा १ लाख १ हजार एकसय रुपियां जम्मा गरेको बैंकका प्रमुख कार्यकारी अधिकृत हृदयराज घिमिरेले जानकारी दिनुभयो ।

 गत बैशाख १२ गतेकोे बिनासकारी भुकम्पबाट पिडितको राहतका लागि बैंकको संचालक समितिको तर्फबाट २२हजार ५ सय ,कर्मचारीको तर्फवाट रु. २५हजार ३ सय र वित्तीय संस्थाको सामाजिक उत्तरदायित्व खर्च शिर्षक तर्फवाट ५३ हजार २ सय ११ गरी जम्मा एकलाख १ हजार एकसय ११ रुपियां आर्थिक सहयोग जम्मा गरेको बैंकले जनाएको छ ।

गोरखा , ३ बैशाख । गोरखामा प्रधान कार्यालय रहेको कसमस डेभलपमेन्ट बैंकले चालू आर्थिक वर्षको गत त्रैमासिकमा एक करोड ८० हजार ६४ रुपियां सञ्चालन मुनाफा कमाएको छ । 

कसमस बैंकले आज गरेको पत्रकार भेटघाट तथा नववर्ष शुभकामना आदान कार्यक्रममा बैंकका कार्यकारी अधिकृत ह्रदयराज घिमिरेले जानकारी दिनुभयो । कूल १४ हजार ग्राहक संख्या रहेको बैंककको चुक्ता पुंजी ४ करोड ३७ लाख ५० हजार र अधिकृत पुंजी ७ करोड रहेको छ । यस बैंकको विभिन्न शीर्षकका १४ प्रकारका खाता रहेकोछ । कसमस डेभलपमेन्ट बैंकले गोरखा सदरमुकाम बाहेक पालुङटार ,आरुघाट र घ्याम्पेसालमा शाखा कार्यालय र छेवेटारमा एक्टेन्सन काउन्टर मार्फत बैंकिङ्ग सेवा सञ्चालन गर्दै आएको छ ।

गोरखा ,६ चैत ।बहुप्रतिक्षित बुढीगण्डकी जलाशययुक्त जलविद्युत आयोजना क्षेत्रको उर्जामन्त्री राधा ज्ञवाली नेतृत्वको एक टोलीले आज स्थलगत अवलोकन भ्रमण गर्नुभएको छ । गोरखा र धादिङ्ग जिल्लाको सीमानामा पर्ने प्रस्तावित १२ सय मेगावाट क्षमताको बुढीगण्डकी आयोजनाको उर्जामन्त्री राधा ज्ञवालीको नेतृत्वमा उर्जा सचिव ,बुढीगण्डकी विकास समितिका पदाधिकारी ,गोरखा र धादिङ्गका सभाषदहरु समेत सम्मिलित टोलीले स्थलागत अवलोकन गरेको हो । 

गोरखा घ्याल्चोकमा स्थानीय लाई सम्वोधन गर्दै मन्त्री ज्ञवालीले भ्रमणका उद्देश्य बारे जानकारी दिनुभयो । मन्त्री नेतृत्वको टोलीले विभिन्न परीक्षण लागि गोरखा घ्याल्चोकमा निर्माण गरिएको टनेल ,प्रस्तावित बांध निर्माण क्षेत्र लगायतका अवलोकन गरेको छ । टोलीले गोरखा घ्याल्चोक देखि आरुघाट सम्मको अवलोकन भ्रमण गर्नुका साथै स्थानीय संग अन्तरक्रिया समेत गरेको छ । अध्ययन सकिने वित्तिकै केही महिनामा नै काम शुरु हुने विकास समितिका अध्यक्ष डा.लक्ष्मी प्रसाद देवकोटाको भनाई छ । टोलीमा गोरखाका सभाषदहरु चिनकाजी श्रेष्ठ ,कमला पन्त ,कृष्ण धिताल ,धादिङ्गका राजेन्द्र पाण्डे ,गुरु बुर्लाकोटी ,धन बहादुर घले लगायतको सहभागीता रहेको छ । ट्रयाक्टवेल इन्जीनियरिङले आयोजना निर्माणँका लागि ड्यामसाइटपावरहाउस ,सर्ट टनेल पावरहाउस र लङ्ग टनेल पावरहाउस ,नन टनेल गरी ३ प्रकारको संरचनागत तथा ६ सय ३० र ९ सय ४५ मेगावाट क्षमतामा निर्माणँ गर्न सकिने विकल्प सहितको प्रतिवेदन बुझाएका थियो ।

गोरखा ,१ चैत । गोरखा सुनचाँदी व्यवसायी संघको प्रथम अधिवेशनबाट अध्यक्षतामा कृष्ण बहादुर विश्वकर्मा सर्वसम्मत चयन हुनुभएको छ । अधिवेशनले उपाध्यक्षमा पर्व बहादुर विश्वकर्मा ,सचिवमा टेक बहादुर विश्वकर्मा ,सहसचिवमा सञ्जय सुनार ,कोषाध्यक्षमा सूर्यमोहन विश्वकर्मा चयन गरेको छ । 

त्यस्तै सदस्यहरुमा रुद्रलाल खड्का सुनार , रुबिन बराइली , दयाराम घिमिरे ,रामबहादुर विश्वकर्मा ,राजेश विश्वकर्मा ,राजु बराइली ,अर्जुन विश्वकर्मा ,खड्क बहादुर विश्वकर्मा ,मनु विश्वकर्मा लाई चयन गरेको छ । सल्लाहकारमा पम बहादुर विश्वकर्मा , नारायण सुनार लाई चयन गरेको र कार्यसमितिमा पछि १ सदस्य मनोनित गरिने अध्यक्ष कृष्ण बहादुर विश्वकर्माले जानकारी दिनुभयो ।

गोरखा , ३० फागुन । गोरखा सुनचांँदी व्यवसायी संघको प्रथम अधिवेशन शुरु भएको छ । अधिवेशन नेपाल सुनचाँदी व्यवसायी महासंघका वरिष्ठ उपाध्यक्ष मोहन कुमार विश्वकर्माले अधिवेशनको उद्घाटन गर्नुभयो । गोरखा सुनचाँदी व्यवसायी संघका अध्यक्ष अम्मर बि.क.को सभापतित्वमा भएको उद्घाटन कार्यक्रममा सुनचाँदी व्यवसायी महासंघका महासचिव देयशरत्न शाक्य ,नेपाली कांग्रेसका रामशरण अधिकारी ,एकीकृत माओवादीका हितमान सुर्खेती ,राप्रपा नेपालका शंकरराज अधिकारी ,गोरखा उद्योग वाणिज्य संघका प्रथम उपाध्यक्ष जीवनज्योति श्रेष्ठ , नेपाल पत्रकार महासंघका अध्यक्ष भीमलाल श्रेष्ठ ,कपडा तथा फेन्सी व्यवसायी संघको तर्फबाट सरोजबावु श्रेष्ठ ,गोरखा सुनचाँदी व्यवसायी संघका पूर्व अध्यक्ष राजेन्द्र विश्वकर्मा लगायतले बोल्नुभएको थियो । कार्यक्रममा सुनचाँदी व्यवसायीले सरकारको सुनचाँदी व्यवसायीको सन्दर्भमा स्पष्ट निति नुहदा व्यवसाय गर्न विभिन्न कठिानाई झेल्न परेको गुनासा गरेका छन । अधिवेशनले गोरखा सुनचाँदी व्यवसायी संघको नयाँ नेतृत्वको चयन गर्ने संघले जनाएको छ ।

गोरखा ,२६ माघ । हाम्रो कृषि हाम्रो सरोकार विषयक एक दिने अन्तरक्रिया सम्पन्न मंगलवार गोरखामा सम्पन्न भएको छ । फरेष्ट एक्सन नेपालको सहयोग तथा तुलसी मेहेर युनेस्को क्लब गोरखाको आयोजनामा भएको अन्तरक्रिया कार्यक्रममा कृषि व्यवसायीकरण तथा आधुनिकीकरणका विषयमा फरेष्ट एक्सन नेपालका कार्यक्रम संयोजक कमल भण्डारी र कृषि सुचना र समाचारका विषयमा नेपाल पत्रकार महासंघ गोरखाका अध्यक्ष भीमलाल श्रेष्ठले सहजीकरण गर्नुभएको थियो । गोरखाको वक्राङ ,ताङलीचोक,घैरुङ्ग ,बुंकोट गाविस र फिनामका किसानहरुको सहभागीता रहेको सो अन्तरक्रियामा जिल्ला स्थित राजनितिक दल ,विषयगत कार्यलयका प्रतिनिधिहरुको सहभागीता रहेको थियो ।

गोरखा ,२५ फागुन ।गोरखा उद्योग वाणिज्य संघको ४२ औं स्थापना दिवसको अवसरमा आज विविध कार्यक्रम सम्पन्न भएको छ । स्थापना दिवसको अवसरमा बिहान ठूलोआंगन देखि चेम्बर मार्ग सम्म सरसफाई गरेको छ । त्यस्तै गोरखा उद्योग वाणिज्य संघले आहाले स्थित सरस्वति उच्च माविका दृष्टिविहीन विद्याथीहरु लाई दैनिक सरसफाई सामाग्री प्रदान गरेको छ । 

गोरखा उद्योग वाणिज्य संघका अध्यक्ष श्रवणकुमार जोशीको सभापतित्वमा सम्पन्न शुभकामना आदान प्रदान कार्यक्रममा संघका पूर्व अध्यक्षहरु शित्तलकाजी मास्के ,इश्वरकाजी मास्के , अच्युतलाल श्रेष्ठ , निवर्तमान अध्यक्ष भगतवावु जोशी ,नेपाल पत्रकार महासंघका अध्यक्ष भीमलाल श्रेष्ठ , महिला उद्यमी विकास समिति गोरखाका अध्यक्ष विष्णु मास्के लगायतले बोल्नुभएको थियो ।

गोरखा ,१९ फागुन । डिस्कभरका थप नयां मोडलका मोटरसाइकल बजारमा आएको छ । डिस्कभरका नयां मोडलहरुमा डिस्कभर १५० एफ (हाफफेरिङ भएको) र डिस्कभर १५०एस(स्ट्याण्डर्ड फेरिङ भएको )कम्पनीले बजारमा ल्याएको हो । 

 डिस्कभर मोटरसाइकलका गोरखा स्थित अधिकृत विक्रेता सुरेन हर्ट प्रा.लि.लेमंगलवार सो दुई मोडलका मोटरसाइकल सार्वजनिक गर्नुका साथै टेष्ट ड्राइभ समेत गराएको छ । आरामदायी सवारी सुनिश्चितता ,सुरक्षित ब्रेकिङ्ग ,आर्कषक बनावट , भरपर्दाे रोड ग्रिप र कम स्पिडमा पनि पूर्ण प्रकाश लगायतका विशेषता डिस्कभरको नयाँ मोडलमा रहेको सुरेन हर्टका प्रबन्ध निर्देशक सुरेन्द्र कुँवरले जानकारी दिनुभयो । नयां आएको डिस्कभर १५० एफ को मूल्य १ लाख ९७ हजार ९ सय र डिस्कभर १५०एस को मूल्य १ लाख ९० हजार ९ सय रहेको पनि कम्पनीले जनाएको छ ।

गोरखा ,१७ फागुन । प्रभु विकास बैंक लिमिटेडले गोरखामा पनि आफ्नो शाखा विस्ता गरेको छ । देशभरमा १ सय १२ औं शाखाका रुपमा प्रभुले गोरखा सदरमुकाममा शाखा विस्तार गरेको हो ।

 प्रभु बैंक गोरखा शाखाको आइतवार एक समारोह बीच नेपाल राष्ट्र बैङ्कका पूर्व कार्यकारी निर्देशक एवं बैकिङ्गविद् भाष्करमणि ज्ञवालीले उद्घाटन गर्नुभयो । यसअघि नै गोरखामा सरकारी स्वामित्वमा राष्ट्रिय वाणिज्य बैंक ,कृषि विकास बैंक र निजी तर्फ नबिल बैंक , एभरेष्ट बैंक ,प्राइम बैंक ,हिमालयन बैंक , क्लिन इनर्जी ,गण्डकी विकास बैंक , मनास्लु र कसमस विकास बैंकले कार्यालय स्थापना गरेर बैकिङ्ग सेवा प्रदान गर्दै आएको छ ।

गोरखा , १४ । फागुन गोरखा नगरपालिकाले महिलाहरु लाई सीप सिकाएर आत्मनिर्भर बनाउने अभियान शुरु गरेको छ ।

 सानै लगानीमा समेत आयआर्जन हुने प्रकृतिका सीप सिकाउनका लागि नगरपालिका विभिन्न प्रकारको तालिमहरु आयोजना गर्न थालेको छ । गोरखा नगरपािलकाको विभिन्न वडाहरुमा भिन्न भिन्न प्रकृतिको सीप विकासका तालिमहरु आयोजना गरेर ,विभिन्न टोलसुधार संस्थाबाट सहभागी गराउने गरेको हो । 

सीप विकास तालिमबाट सहभागीहरुले सीप सिकेर आत्मनिर्भर बन्न सक्ने भएकोले सीप विकास तालिम सञ्चालनमा विशेष प्राथमिकता दिएको गोरखा नगरपालिकाका कार्यकारी अधिकृत चन्द्रा थापामगरले बताउँनुभयो । गोरखा नगरपालिकाले मुढा बनाउने ,इम्ब्रोडरी र क्रिष्टल डिजाइनिङ्ग तालिम सम्पन्न गरिसकेको छ । हालै मात्र वडा नं १ मा पर्ने १० वटा टोलसुधार संस्थाका ६० जना महिलालाई नगरपालिकाले क्रिष्टल डिजाइन तालिम दिएको छ ।

नुवाकोट ,१ फागुन । गोरखा उद्योग वाणिज्य संघको आयोजनामा देखि नुवाकोटमा ३ दिने कार्य योजना तुर्जम गोष्ठी शुरु भएको छ ।
 जिल्ला बाहिर नुवाकोटको त्रिशुली बजारमा आयोजित कार्ययोजना तुर्जमा गोष्ठीमा ३ वर्ष सम्म सम्पादन गर्ने संघको योजना तय गरिने गोरखा उद्योग वाणिज्य संघका महासचिव भगवानवावु मास्कले जानकारी दिनुभयो । गोष्ठीको एक समारोह बीच नुवाकोट उद्योग वाणिज्य संघ अध्यक्ष राजन श्रेष्ठले उदघाटन गर्नुभयो । गोष्ठीमा संघका अध्यक्ष सहित निवर्तमान अध्यक्ष तथा पदाधिकारी ,महिला उद्यमी विकासका सचिव रिता रेग्मी तथा नेपाल पत्रकार महासंघका अध्यक्ष भीमलाल श्रेष्ठ पनि सहभागी रहेको संघले जनाएको छ

काठमाण्डौं ,२७ माघ । पेट्रोलियम पदार्थको मूल्य लगातार घटेपछि सरकारले सार्वजनिक सवारी साधानको भाडादरमा पनि सामान्य कटौति गरेको छ । यातायात व्यवस्था विभागले मंगलबार पेट्रोलियन पदार्थमा मूल्य घटेपछि सावारी साधानको भाडा घटाएको हो ।विभागका अनुसार यात्रुबहाक सवारी साधानमा २ दशमलव शुन्य तीन प्रतिशत घटेको छ । यस्तै मालवहाक साधानमा तराईमा पाँच दशमलब दुई आठ प्रतिशत र पहाडमा चार दशमलव तीन सात प्रतिशत भाडा घटेको छ । यस्तै ट्याक्सी र पर्यटक गाडीमा एक दशमलव छ दुई प्रतिशत भाडा दर घटेको छ ।भाडादर घटेपछि अब काठमाडौं उपत्यकामा न्यूनतम १३ रुपैयाँ देखि अधिकतम २५ रुपैयाँसम्म भाडादर लागू हुनेछ । यसअघि मंगलबार संसदको विकास समितिले पनि भाडा समायोजन गर्न निर्देशन दिएको थियो ।

गोरखा,२१ माघ । गोरखा इलाका नं १ को योजना तर्जुमा गोष्ठी बुधवार सम्पन्न भएको छ । स्थानीय विकास अधिकारी प्रेमराज गिरीको प्रमुख आतिथ्यता र गोरखा नगरपालिकाका कार्यकारी अधिकृत चन्द्रा थापामगरको अध्यक्षतामा योजना तर्जुमा गोष्ठी सम्पन्न भएको हो । गोष्ठीमा इलाका नं १ का अन्र्तगतका प्रस्तावित योजनाहरु गोरखा नगरपालिकाका रामकुमार श्रेष्ठले पेश गर्नुभएको थियो । गोष्ठीमा जिल्लास्तरीय ,नगरस्तरीय र वडास्तरीय राजनितिक परामर्श समितिका सदस्य ,विभिन्न संघ संस्थाका प्रतिनिधिहरु सहभागीता रहेको थियो ।

काठमाण्डौं ,१९ माघ । नेपाल आयल निगमले पेट्रोलियम पदार्थको भाउ घटाएको छ। निगमले डिजेल र मट्टितेलमा डेढ रुपैयाँ तथा पेट्रोलमा दुई रुपैयाँ ५० पैसा भाउ घटाएको हो। निगमले सोमबार राति १२ बजेदेखि कार्यान्वयन हुने गरी नयाँ मूल्य तोकेको हो। घटेको भाउ अनुसार अब डिजेल र मट्टितेलको मूल्य प्रति लिटर ८६ रुपैयाँ ५० पर्छ। यसअघि यी पदार्थको मूल्य ८८ रुपैयाँ प्रति लिटर थियो। यस्तै पेट्रोलको मूल्य प्रतिलिटर एकसय नौ रुपैयाँ पर्नेछ। यसअघि पेट्रोलको मूल्य एकसय ११ रुपैयाँ ५० पैसा थियो।भारतीय आयल निगमबाट नयाँ मूल्य सूची प्राप्त हुने बित्तिकै मूल्य समायोजन गरेको हो। स्वचालित मूल्य प्रणाली अनुसार निगमले आइतबार नै भाउ घटाउनु पर्ने भएपनि भारतमा बिदा परेकाले सोमबारमात्रै मूल्य समायोजन भएको हो। निगमले असोज १३ गते यता हरेक १५/१५ दिनको अन्तरमा पेट्रोलिमयम पदार्थको मूल्य समायोजन गर्दै आएको छ।नयाँ मूल्य अनुसार निगमलाई अब ग्यासमा प्रतिसिलिन्डर ४० रुपैयाँ मात्रै घाटा छ। यसअघि यो घाटा बढेर ११ सय रुपैयाँसम्म पुगेको थियो। ग्यासमा घाटा उल्लेख्य रुपमा घटेसँगै निगमको नाफा भने बढ्ने देखिन्छ। निमगले गत महिना ३४ करोड ८० लाख रुपैयाँ नाफा गरेको थियो। निगमले खाना पकाउने ग्यासको मूल्य भने समायोजन गरेको छैन।अन्तर्राष्ट्रिय बजारमा कच्चा तेलको मूल्य पछिल्लो पाँच वर्ष यताकै न्यून भएसँगै नेपालमा पनि भाउ घट्दै आएको छ। यद्यपि निगमले अन्तर्राष्ट्रिय बजारको अनुपातमा मूल्य समायोजन नगरेको भन्दै उसको आलोचना हुँदै आएको छ। अन्तर्राष्ट्रिय बजारमा कच्चा तेलको मूल्य ५० डलर प्रति ब्यारेलको हाराहारीमा आएको भए पनि नेपालमा भने थोरै मात्रै मूल्य समायोजन गर्ने गरेको हो।यसअघि निगमले यही माघ ४ गते पेट्रोलियम पदार्थको भाउ घटाएको थियो।