धुमधाम संग लाप्राकीले गराए मकैको विवाह
रेनु श्रेष्ठ (गोरखा ,२१ माघ) । अघि अघि झ्याई झ्याई बाजागाजा । डोली सहित जन्तीका लस्कर अनि भोजभतेर । यो वातावरण जुन कुनै विवाहका लागि नौलो भने होइन । तर गोरखाको लाप्राकमा यसरी नै बुधवार बाली मध्ये एक मकैको विवाह सम्पन्न भएको छ । गोरखाको दुर्गम गाविस लाप्राकका स्थानीय वासिन्दाले धुमधाम संग मकैको विवाह गरिदिएका छन । स्थानीय ठूलोआँगन बाट एकजना मानिसलाई बेहुला बनाएर डोलीमा लिएर बाजागाजा सहित गएका जन्तीले मकै ल्याएर विवाह विधि पूरा गरे संगै गाउँलेहरु भेला भएर भोज खाए पछि विवाह समारोह सकिएको थियो ।
मकैको विवाह पछि मात्र उत्तरी गोरखाका विभिन्न गाविसमा मकै रोप्ने चलन छ । मकैका विवाह गर्दा मकै लगायतका अन्य बालीको उब्जनी राम्रो हुने जनविश्वास रहेको छ । अघिल्लो दिनमा केही मकैको घोगालाई जमिन मुनी गाडेर राख्ने र भोली पल्ट गएका जन्तीले उक्त मकैको घोगालाई निकालेर ल्याई विवाह गराई दिने चलन रहेको भबिराज गुरुङ्गले जानकारी दिनुभयो । मकैको विवाहका दिन त्यहाँ विद्यालय ,स्वास्थ्य संस्था लगायतका सबै सरकारी कार्यालयहरुमा समेत स्थानीय विदा हुने गरेको छ ।
0 comments